Hej hej Parken... :'(

Mikið getur maður orðið svekktur þegar skýjaborgirnar sem maður hefur dundað sér við að byggja undanfarna daga hrynja. Þá er ég auðvitað að tala um leik FC Köbenhavn og Manchester United sem verður á Parken 1. nóvember næstkomandi. Í dag klukkan 10:00 (fyrir hálftíma síðan) áttu miðarnir að fara í sölu. 10-15 mínútum síðar segir billetlugen.dk að það sé búið að selja alla miða og fólk geti náðarsamlegast skráð sig á biðlista. Ég komst ekki einu sinni lengra en skrefið sem leyfði mér að velja fjölda miða. En vonandi fáum við miða í gegnum biðlistann, annars verð ég bara að gera mér það að góðu að horfa á þetta í sjónvarpinu... :(

Annars var gærdagurinn helvíti nettur! Fórum eldsnemma í gærmorgun og sóttum okkur bíl á 'bílaleigu' sem er staðsett bókstaflega í næsta húsi. Þegar ég segi 'bílaleiga' þá meina ég að þetta er fyrirtæki sem leigir út bíla, ekkert mikið meira en það og bílarnir endurspegla það á vissan hátt. Engar glæsikerrur eins og hjá Hertz og Avis en fjandakornið nógu gott fyrir okkur að minnsta kosti. Á þessari 'lúxusdrossíu' (sem var Fiat Punto) keyrðum við (Þórunn keyrði, ég sá um kortið) með Sigríði alla leið í Ishøj til að kaupa okkur teppi og lampa (og eitthvað smádót að auki) í ILVA og fórum svo þaðan í IKEA sem er þar skammt frá þar sem við keyptum eitthvað meira smálegt og fengum okkur sænskar kjötbollur í hádegismat eins og IKEA einum sæmir.

Því næst tókum við stefnuna á Fields þar sem við gerðum slæma ferð í Bilka, keyptum tvö lök og fengum að bíða í hálftíma í röð til að fá að borga þau. Frábær þjónusta þar á ferð...

Í gærkvöldi var svo aðalfundur ÍF Guðrúnar þar sem farið var í gegnum venjuleg aðalfundarstörf og ný stjórn kosin. Skemmst er frá að segja að ég tók að mér að vera gjaldkeri félagsins næsta árið í það minnsta. Að auki kemur Gummi Þorkels (Prumminn með meiru) sterkur inn í stöðu vinstri formanns og Jón Auðunn smellir sér í bakvörðinn í varaformanninn. Það er því ljóst að það eru bjartir tímar framundan hjá Guðrúnu með slíka eðalstjórn! ;)

Allsherjarhreingerning haustið 2006

Annar dagurinn í sameiginlegu sumarfríi okkar hjóna byrjaði eins og lög gera ráð fyrir, með því að sofa frameftir og glápa svo á bíómynd uppi í rúmi (The Sentinel, ágætis skemmtun). Þegar við svo loksins dröttuðumst á fætur þá hófumst við handa við að fara í gegnum fjármálin og leystum það verkefni af með glæsibrag. Svo hófst loks alvaran, þrifin...

Eins og venjulega þá dæmdist klósettið á mig en eins og ég hef áður tekið fram þá finnst mér það bara hið besta mál, hef ekkert á móti því að þrífa mitt eigið klósett af og til. Klósett annarra hinsvegar snerti ég ekki nema bara með rasskinnunum. Brá á það snilldarráð að smella bara á mig iPod-inum og hlusta á Apana í Eden með þeim Baggalútsfélögum. Ákaflega góð blanda, klósettþrif og Baggalútur, smellur eins og flís við rass! :D

Á meðan þreif Þórunn eldhúsið hátt og lágt og ég smellti mér svo á ryksuguna og saug upp þriggja mánaða skammt af ryki sem hafði safnast fyrir á öllum mögulegum og ómögulegum stöðum í íbúðinni yfir sumarið. Að lokum smelltum við okkur svo í skúringar og skúruðum öll gólfin hérna líka. Það er því óhætt að segja að hreingerningarilmurinn tröllríði húsum hér á Amager...

Í kvöld verður svo haldið í bæinn og út að borða með hefðarfólkinu Hönnu Gunnu og Ómari þar sem skvísan sú á víst 28 ára afmæli í dag. Ætli það sé ekki viðeigandi að við skúrum bæinn bleikan í kvöld líka? ;)

Mættur á svæðið!

Jæja! Það er víst tímabært að taka þetta blogg úr löngu og góðu sumarfríi því við hjónin erum víst mætt aftur út til Köben þar sem við munum dvelja þangað til við förum aftur eitthvað af stað (sem verður einhvern tímann og einhvern tímann)...

Þó svo bloggið hafi verið í fríi (og ég líka að vísu) þá hefur maður aldeilis ekki setið aðgerðarlaus á meðan heldur gert eftirfarandi:

• Unnið (auðvitað)
• Farið í útilegu (í nýja tjaldvagni tengdó) í 1000 vindstigum á Akureyri
• Farið í veiði með gamla settinu, Nonna móðurbróður og Gulla félaga þar sem kallinn landaði tveimur 'smálöxum' (töldu skitin 3 pund hvor)
• Sá steindautt jafntefli Íslands og Spánar á Laugardalsvellinum
• Upplifði kvöl og pínu allt að þrisvar sinnum í viku í stöðvaþjálfun í Laugum
• Fór nokkrum sinnum í golf (með litlum árangri þó)
• Fór í brúðkaup hjá Sólu og Ingó
• Fór í 'frægðarför' með 'stórliðinu' Markaregni til Ísafjarðar og upplifði stærsta tap á knattspyrnusviðinu síðan í 5. flokk (11-12 ára fyrir þá sem ekki þekkja til), sannkallað markaregn, töpuðum 11-1
• Slakaði á og gerði ekki neitt...

Þetta var semsagt í grófum dráttum 'afrek' sumarsins. En nú erum við sumsé kominn aftur út og búin að afreka að taka upp úr töskunum og ég fór meira að segja á fótboltaæfingu áðan!

En plan vikunnar er semsagt að klára sumarfríið (skólinn og vinnan byrja aftur á mánudag) og erum við þegar búin að panta okkur bílaleigubíl til að stússast í IKEA og ILVA á fimmtudag. Svo verður helgin bara í tekin í góðri afslöppun (eins og hinir dagarnir sennilega líka)... :D