Klakinn...

...er ekki réttnefni á litla landið í Atlantshafi þessa stundina. Hér er alls enginn klaki heldur bara skítarigning og leiðinda rok. Eiginlega er eins og við höfum ekki farið neitt því þetta er sama veður (meira rok hér þó) og hefur verið í Kaupmannahöfn í allt haust. En maður ætti svosem að vera orðinn vanur svona veðráttu eftir öll þessi ár sem maður hefur búið á Íslandi...

Gærdagurinn fór eiginlega allur í ferðina hingað, fór heim um hádegið úr vinnunni og við Þórunn gengum frá því sem þurfti að ganga frá, kláruðum og/eða hentum matarafgöngum, tókum allt úr sambandi og læstum öllum gluggum. Hentum svo í tösku og tókum leigubíl út á Kastrup. Vorum svo sniðug að tékka okkur inn með sjálfsala í staðinn fyrir að standa í röð. Sérdeilis þægilegt að geta bara klárað þetta af sjálfur. Héldum að þetta yrði aldeilis þægilegt þegar hér var komið sögu þegar í ljós kom að það var tveggja tíma seinkun á vélinni sem varð svo í heildina enn lengri því það tók svo langan tíma að hlaða vélina með öllu draslinu sem þurfti að flytja með henni. Við vorum því ekki að lenda á Íslandi fyrr en rétt fyrir eitt eftir langt flug (sökum mótvinds) þar sem við sátum í þokkabót í næst öftustu röð þannig að við fengum allan hristinginn beint í æð...

Vaknaði svo í morgun klukkan átta til að henda mér í vinnuna með tengdó. Þar voru allir voðalega kátir að sjá kallinn eins og gefur að skilja. Það var að vísu ekki mikið unnið en hver getur svosem unnið svona rétt fyrir jólin hvort eð er? ;)

Jólasveinaleiðangur 2006

Það getur komið fyrir að Þórunn fái góðar hugmyndir. Sú var einmitt raunin í gær (að vísu kom hugmyndin fyrst upp fyrr) þegar við leigðum okkur bíl hjá Leigðu-brak til að keyra út pakka og þess háttar til þeirra sem við þekkjum hérna í Kaupmannahöfn og ætla að dvelja hér yfir jólin. Við höfðum ákveðið að þar sem ég er svoddan bakari að útbúa gjafakörfur með heimabakaðri kæfu og nýbökuðu rúgbrauði og færa liðinu (þeim vonandi til mikillar ánægju). Og þar sem við þurftum einnig að koma út fleiru (t.d. heilum kassa af malti + appelsíni) þá sáum við framá að við gætum sennilega aldrei komist með þetta allt í strætó/metró/lest nema í nokkrum ferðum og það var eitthvað sem við nenntum auðvitað engan veginn...

Við sóttum brakið í gær um hálf fimm og brakið reyndist bara vera hinn ágætasti kaggi, meira að segja með geislaspilara. Við sömdum við Leigðu-brak um að borga þeim 228 danskar krónur gegn því að þau létu okkur fá bílinn með 50 kílómetra innifalda og að við skiluðum honum aftur klukkan 7:30 í morgun. Við héldum svo af stað með viðkomu hjá Jonna og Erlu, Hönnu Gunnu og Ómari, Runa og Heiðrúnu (sem voru svo góð að bjóða okkur í kvöldmat líka, afskaplega vel þegið) og að lokum hjá Ragnhildi og Bruno. Allir voru mjög ánægðir með innlitið og glaðninginn og spurning hvort við gerum þetta ekki bara að árlegum viðburði ef vel heppnast (vitum það auðvitað ekki fyrr en eftirá, tökum samt ekki við neinum kvörtunum!). Við skiluðum svo bílnum aftur í morgun á umsömdum tíma, fullum af bensíni, eftir 47 kílómetra leiðangur um Kaupmannahöfn. Vel heppnuð ferð í alla staði!

Í kvöld verður svo haldið út á Kastrup til að húkka far með Icelandair til Íslands klukkan 20:20, áætluð lending í Keflavík klukkan 22:10 með flugi FI-213 (in case að einhver hafi áhuga á að vita það)...

Hurðum skellt!

Hrökk upp í nótt við það að hurðum var skellt í íbúðunum í kringum mig í gríð og erg. Vissi ekki hvaðan á mig stóð veðrið fyrr en ég fattaði að helv.... sjöundi jólasveinninn var sennilega að leita að mér í húsinu. Og til að kóróna þetta allt saman þá fann hann mig ekki því ég fékk nákvæmlega ekkert í skóinn frá honum. Allt í lagi að vekja mann upp af værum blundi ef maður hlýtur eitthvað fyrir, hefði meira að segja getað sætt mig við kartöflu eftir allan hamaganginn... ;)

Annars hefur verið mikið étið síðustu daga því að gamla settið var í heimsókn yfir helgina og það þýðir bara eitt, við þurfum ekki að sjá um neinn mat á meðan. Við erum búin að fara á ítalskan stað (tvisvar), borða á Nyhavn og að auki skella okkur í julefrokost í Tívolí. Að auki kláruðum við af allar jólagjafir og létum svo gamla liðið taka þetta allt með sér heim til að redda okkur tax-free á allt draslið. Eitthvað af þessari viðskiptakennslu sem ég fékk í Verzló á sínum tíma er greinilega að skila sér núna! :D

Á morgun verður svo haldið á Klakann eftir fjögurra mánaða veru í Kaupmannahöfn. Bölvaði ekki lítið þegar ég sá að veðrið á Íslandi hefur tekið stóra U-beygju og er núna orðið nákvæmlega eins og hér, hiti og rigning! Hefði alveg þegið smá kulda og jafnvel snjó, ég meina kommon (svo ég vitni aðeins í tengdó), landið heitir nú einu sinni Ísland!

Og ég var víst valinn maður ársins hjá Time Magazine, ekki amalegt svona rétt fyrir jólin að tilvera mín sé metin að verðleikum...