Phobophobia?!?

Kláraði í gær að henda upp restinni af jólaskrautinu og þar með er húsið (íbúðin) formlega skreytt. Það sem var eftir var að henda greni + jólaseríu á svalirnar og var ég að bregða á það ráð að fara fyrr heim úr vinnunni í gær til að ná að gera þetta í björtu (ferlegt þegar það er komið myrkur um fjögurleytið). Það er því orðið afskaplega jólalegt hjá okkur þessa stundina, það eina sem vantar er að fá gott frost með tilheyrandi ofankomu til að fullkomna jólastemmarann með smá snjólufsu. Er nú ekki að biðja um mikið, bara smá föl (30-40 cm a.m.k.)... :D

Rakst á þetta í daglegri yfirferð minni yfir það nýjasta á netinu. Hræðsla við hræðslu (Phobophobia)??? Hræðsla við að ganga (Stasibasiphobia)??? Hræðsla við mat (Sitophobia (hvernig lifir maður með svoleiðis))??? Hræðsla við hluti hægra megin (Dextrophobia) eða vinstra megin (Levophobia) við sig??? Og svo toppurinn, hræðsla við löng orð (Hippopotomonstrosesquippedaliophobia (að sjálfsögðu er það þá MJÖG langt orð))??? Renndi í gegnum þetta og sá að ég hef ekkert af þessu, tjah, nema kannski smá vott af Ergophobia... ;)

Annað sem ég rakst á var þessi snilldar upptalning á 100 hlutum sem gera það að verkum að það er betra að vera karlmaður! Get nú ekki annað sagt en að ég sé sammála flestu ef ekki öllu, það er fínt að vita til þess að einn góðan veðurdag verð ég gamall perri (#86). Vil líka sérstaklega benda á #2, #4, #11, #87, #95, #100 og að sjálfsögðu #17. Ætli ég fái ekki svipaðan lista fyrir konur í hausinn á næstu dögum, bring it on!!!

Ah, Danir...

Það skyldi enginn halda því fram að Danir séu leiðandi þegar kemur að tækniframförum. Jafnvel einfaldir hlutir eins og Visakort eru þeim gjörsamlega ofviða, allavega ef eitthvað er að marka samskipti konunnar við ekki bara einn, heldur tvo banka fyrr í dag. Forsaga málsins er sú að hún ætlaði að borga skíðaferðina góðu með kreditkorti til að fá fría ferðatryggingu, en þar sem ferðaskrifstofan er í Vejle (sem er á Jótlandi = úti í sveit) og veit aukinheldur ekki hvað símgreiðsla með korti er þá var brugðið á það ráð að fara í banka til að taka út pening af kortinu og millifæra svo á ferðaskrifstofuna. En enn og aftur þá koma Danir á óvart og gullmolar eins og "Við getum ekki vitað hvort það sé innistæða á kortinu" fengu að fjúka úr vörum afskaplega 'hjálpsamra' starfsmanna bankans. Síðan hvenær er til eitthvað sem heitir innistæða á kreditkorti? Og í öðru lagi, kæmi þá ekki bara synjun á kortið þegar bankinn myndi reyna að strauja það??? Og í þokkabót varð starfsmaður bankans bara hinn versti þegar Þórunn kallaði bankakerfið þeirra gamaldags og lélegt, verð nú að gefa henni extra prik fyrir að láta þá allavega heyra það fyrst þetta gekk ekki betur en þetta... ;)

Fattaði að ég gleymdi jólalagINU á listann minn um daginn og bið ég Bing Crosby innilega afsökunar á því og lofa honum að ég læt mig dreyma um hvít jól með hann í eyranu á hverjum degi fram að jólum til að reyna að bæta honum þetta upp. Einnig gleymdi ég einni stórgóðri jólamynd í þokkabót sem hefði sómt sér vel á listanum (og hefði auk þess komið fjölda mynda í hina skemmtilegu tölu 13). Sérstaklega er þetta pínlegt í ljósi þess að ég talaði nú inná þessa mynd á sínum tíma (eða, hefði allavega getað það (sópran dauðans)) og ég verð því líka að biðja Gizmo vin minn um að fyrirgefa mér og lofa honum að ég líti á hann fyrir þessi jól (og öll jól hér eftir)...

Talandi um tölur, í dag eru 7 dagar þangað til við komum til Íslands, 12 dagar til jóla, 20 dagar í áramót, 46 dagar í skíðaferðina, 52 dagar í afmælið mitt, 171 dagur í afmælið hennar Þórunnar og ekki nema 34.353 dagar í næstu aldamót. Nóg að hlakka til!