Thank you for nothing!

Í dag er þriðjudagur og það þýðir að það eru tveir dagar liðnir frá 'Glerplötusprengingunni miklu á Bremensgade 17' eins og ég kýs að kalla atvikið. Ástæðan fyrir því að ég nefni það aftur er að IKEA hefur ekki enn séð sóma sinn í því að hafa samband við okkur! Maður hefði nú haldið að svona stórt og virt fyrirtæki myndi líta það alvarlegum augum ef vara sem það framleiðir tekur allt í einu upp á því að springa í tætlur af engri sjáanlegri ástæðu og vildi rannsaka málið og e.t.v. innkalla vöruna ef í ljós kæmi að um alvarlegan framleiðslugalla væri að ræða. En þeim er víst nokk sama enda annálaðir fyrir einkar slæma þjónustu (nenna ekki einu sinni að setja saman vörurnar sínar sjálfir ;)) og kom í sjálfu sér ekkert á óvart. Ég ráðlegg bara öllum að halda sig fjarri hertu (eða kannski skertu?!?) IKEA gleri, aldrei að vita hvenær það 'gefur upp öndina'...

Í morgun var aftur orðið skaplegt fáksveður og því hafði ég engar afsakanir lengur fyrir að brúka ekki kvikindið til að selflytja mig í vinnuna. Verst var með helvítis rokið en ég lækkaði bara um gír og setti á rólega tónlist í iPod-num, ekkert að því að vera tvöfalt lengur að koma sér í vinnuna ef maður sleppur við að svitna eins og svín. Samt eitthvað rangt við það þegar eldgamlar kellingar bruna framúr manni á hjólum sem eru síst yngri en þær sjálfar, oh well...

Og fyrir ykkur sem eruð eitthvað morgunfúl þá get ég mælt með þessari síðu. Alltaf gaman þegar menn ausa úr skálum reiði sinnar yfir, tjah, öllu, sýnist mér! Kom mér allavega í gang í morgun! :D

World War III!!!

Það var allavega það fyrsta sem mér datt í hug í morgun þegar ég hrökk upp við það sem við gætum kallað sprengingu! En þegar ég varð ekki var við fleiri þessháttar hljóð í kjölfarið þá fór ég og athugaði hvað hafði valdið þessum hávaða. Ég heyrði að hljóðið kom frá hinum hluta svefnherbergisins, þar sem Þórunn er með lesaðstöðu. Þegar ég kem þangað sé ég að gólfið er þakið í glerbrotum og því var fyrsta hugsunin sú að eitthvað hefði brotið gluggann, grjót eða e.t.v. fugl. En við nánari athugun kom í ljós að gluggarnir voru heilir en hinsvegar var herta glerplatan, sem við höfðum keypt með skrifborðinu og sett ofaná það, sem hafði orsakað allan þennan hávaða og hafði semsagt tekið uppá því í morgun að springa bara uppúr þurru (sjá mynd)!

Við hringdum að sjálfsögðu beint í IKEA (sem höfðu selt okkur borðið og glerplötuna) til að láta þá vita, ekki til að heimta nýja plötu eða skaðabætur heldur til þess að þeir gætu gert ráðstafanir varðandi aðra sem höfðu keypt þessa sömu plötu ef ske kynni að um framleiðslugalla væri að ræða. En merkilegt nokk þá hafði kellingin sem ég talaði við hjá IKEA miklu meiri áhuga á því að ég fyndi nótuna sem ég fékk með kaupunum (sem við erum löngu búin að henda btw) og var víst ekki að gera sér fulla grein fyrir alvöru málsins, sagði að ef ég fyndi ekki nótuna gætu þau ekkert gert. Sagði okkur þó að taka myndir af óskapnaðinum og senda þeim, þau myndu svo bara hafa samband. Frábær þjónusta hjá IKEA, ætli við hefðum ekki fengið betri þjónustu ef svo 'skemmtilega' hefði viljað til að Þórunn hefði setið við borðið, tjah, eða Agnes hefði verið í pössun í nótt og önnur hvor þeirra hefði fengið glerrigningu yfir sig, þætti gaman að vita hversu mikinn áhuga þau hefðu haft á málinu þá...

Og sjaldan er ein báran stök því ég ætlaði svo að henda í þvottavélar áðan, drösslaði tveimur stútfullum pokum af þvotti niður í þvottahús, fyllti fjórar vélar og setti þvottaefni á þær allar. Ætlaði svo að nota þvottakortið til að geta gangsett vélarnar en að sjálfsögðu fékk ég þau skilaboð að það væri 'villa á kortinu'. Það var alveg sama hvað ég reyndi, ekki vildi maskínan taka við kortinu. Ég þurfti því að taka allan þvottinn úr vélunum aftur og drösslast með þvottinn óþveginn aftur upp í íbúð... :(

Vona bara að 'the laws of three' sé ekki regla og frekar bara mýta því að þá á væntanlega eitthvað eftir að gerast í kvöld til að fullkomna þrennuna. Heppilega er ég ekki hjátrúarfullur en maður skyldi þó aldrei segja aldrei... ;)