Fríkaður föstudagur

Glampandi sól og blíða, það er páskaveðrið sem er í boði hérna í Kaupmannahöfn, ekki amalegt það. Ekki það að ég sé úti að sleikja sólskinið, osei sei nei, sit bara inni að leika mér í tölvunni. Fór að vísu í ræktina áðan og lyfti og hljóp (er allur að koma til í þessu) og Þórunn situr við lærdóminn í 'norðurálmu' íbúðarinnar. Semsagt, páskadagskráin (sú ráðgerða) er enn í fullu fjöri...

Fór á æfingu eldsnemma í gærmorgun, vildum hafa hana snemma til að slíta ekki í sundur daginn. En að sjálfsögðu þá nýttu menn sér fríið í að gera eitthvað allt annað en að spila fótbolta því við vorum bara sjö sem mættum (again). Að vísu var þetta alveg prýðileg æfing, tókum léttan reit, smá spil og svo skotæfingu í lokin (ekki veitir af). Undir lokin var okkur svo hent út af svæðinu (megum víst ekki vera þar) og verðum því að finna annan völl fyrir næstu æfingu... ;)

Fór svo heim til Jonna að skanna nokkur skjöl sem endaði bara með að ég var þar fram á kvöld. Erla fór að læra og Jonni var bara einn með kútinn þannig að ég ákvað að hanga bara með honum. Horfðum á nokkra Friends þætti og slökuðum vel á í anda páskanna...

Í kvöld er stefnan svo sett á  Øresundskollegíið þar sem Stefán og Sóley (og Margrét Nótt) eru búin að bjóða okkur í langan föstudagsmat, verður ábyggilega eitthvað vel útilátið ef ég þekki þau rétt, spurning um að svelta sig fram að því...

Páskafrí!!!

Jæja, þá er páskafríið formlega byrjað! Sit einmitt og glápi á sjónvarpið (eins og páskadagskráin mín hljóðaði uppá) þar sem verið er að sýna Lethal Weapon 3 á TV3+. Að vísu er þetta auglýsingastöð þannig að maður fær reglulega klósett- og/eða bloggpásur sem ég er einmitt að nýta mér núna...

Við hjónin tókum okkur til í gær og röðuðum öllum geisladiskunum okkar, já, þið heyrðuð rétt, röðuðum geisladiskunum! Við erum greinilega bæði orðin eitthvað geðveik (raðaði einmitt DVD myndunum í stafrófsröð um daginn). En allavega, við þurftum að sjálfsögðu að ákveða eitthvað kerfi á röðunina og úr varð að við skiptum geisladiskunum upp í nokkra flokka sem eru eftirfarandi:

• Erlend tónlist
• Íslensk tónlist
• Klassísk tónlist
• Kvikmyndatónlist og söngleikir
• Safndiskar

Að sjálfsögðu er svo diskunum raðað í stafrófsröð innan hvers flokks, annað væri auðvitað bara fáránlegt... ;)

Einn dagur í einn dag í skírdag

Mánudagar eru alltaf frekar leiðinlegir dagar. Ef ekki væri fyrir salsakennsluna og Grey's Anatomy (uppáhalds þættir konunnar) þá mætti jafnvel segja að mánudagar séu glataðir! Og það var einmitt það sem gerðist í gær, páskafrí í dansinum og enginn þáttur af Grey's! Og hvað gerðum við svo til að gera daginn skemmtilegri? Jú, við fórum í ræktina, enough said...

Sigríður mágkona kom hérna við í gær okkur að miklum óvörum. Hún hafði víst tekið sig til og labbað af stað heiman frá sér og ætlaði að labba að sjónum. Eitthvað er hún áttavillt stelpan því hún fann ekki sjóinn fyrr en út á Amager (labbaði semsagt í suður en ekki í austur). Hún hafði það af að vera á rölti í næstum fjóra tíma og kom bara við hjá okkur til að nota klósettið (hvort það var númer eitt eða tvö fylgdi ekki sögunni).

Ég hef aldrei skilið þessa löngun fólks í að labba bara til að labba og það sérstaklega ekki innanbæjar. Ég vil hafa einhvern tilgang í röltinu, klífa fjallið, ganga dagleiðina, labba út í sjoppu. En þessi ganga sér til 'hressingar' og 'skemmtunar' er að mínu mati hvorki hressandi né skemmtileg. Í besta falli er hún þreytandi og í versta falli leiðinleg. Áðan labbaði ég út í strætó og úr strætó í lest og úr lestinni á völlinn þar sem við æfum fótbolta (og svo eins til baka nema öfugt). Tilgangur! Ekki bara rölt röltsins vegna...

Sunnudagurinn hans Pálma

Hver er eiginlega þessi Pálmi?!? Pálmi Gunnarsson kannski? Eða Pálmi Gests?? Hef aldrei skilið hvernig þessi Pálmi tengist páskunum á nokkurn hátt. En dagurinn hans er altént fyrsti dagur hinna eiginlegu páska þannig að eitthvað hlýtur hann að hafa lagt til málanna... ;)

Fór á morgun af stað klukkan rúmlega tíu á æfingu í ausandi rigningu, var við það að fara að snúa við og leggjast aftur undir sæng. Heppilega hélt ég mér við fyrirfram ákveðna áætlun því á leiðinni á æfingu hætti að rigna og ekki nóg með það, þegar við byrjuðum að sparka í knöttinn var að birta til og við fengum þetta fína sólskin alla æfinguna. Því miður var mætingin ákaflega slök því við vorum bara sjö sem mættum. En við reyndum að sjálfsögðu að gera gott úr því, eins og góðum dátum sæmir!

Fór svo að horfa á fótbolta seinnipartinn og náði að horfa á tvo heila leiki, Liverpool vs. Bolton og svo stórleik United á móti Arsenal. Skemmst er frá að segja að United vann verðskuldaðan 2-0 sigur á þreyttu Arsenal liði og var sigurinn síst of stór. Alltaf gaman að vinna Arsenal!

Jonni var eitthvað að 'gorta' sig af því að hafa heimsótt heil 3% landa í heiminum (að vísu ekki, var eiginlega að tala um hversu slappur hann væri). Ég get nú næstum þrefaldað þessa tölu hans því skv. þessari síðu hef ég víst heimsótt 8% landa heimsins. Aukinheldur fær maður svona skemmtilegt landakort sem merkir inná þau lönd sem maður hefur kíkt á, ansi skemmtilegt og fræðandi.